الصغار صارو كبار .. فاطمة البلطجي

فاطمة البلطجي

لصغار صاروا كبار

اوْلادْنا كِبْروا
وما عادوا لِصْغار

كانوا عفْراشهم يناموا
قبل موعد الأخبار

بعد الرسوم يرسموا
شوية لعب وأفكار

كل همهم شو ياكلوا
ما هَمْهُم شو صار

فجأة لْقِيتْهم بيهتفوا
بساحة الثوّار

بدهُم وطن يبنوا
كل همهم الإعمار

بكرامتهم يعيشوا
مش ورا ناس كبار

بدهم يشتغلوا
بمهن كتيرة كتار

بس ما فيهم لأنو
البلد عمينهار

ناموا وبنومهم حلموا
بسيارة وعفش ودار

وهوا نضيف يشمّوا
من شجر داير مندار

وعروس لقلبهم يضموا
وبحضنهم اوْلاد كْتار

حلمهم ما يفارقوا
رْفاق عمرهم وْلا نْهار

وبكرا شو ما بيعرفوا
وبيجهلوا المسار

يمكن بالطّريق يضلّوا
او بساحة المطار

او بالبحر يهربوا
لْبلد فيها كفّار

بالغيب ما بيعلموا
ولا بيكشفوا أسرار

هيدا الوطن ما بيهجروا
الا لو هوّي اختار

اولادنا الْكِبْروا
يا محلى لِمْ كانوا صْغار