خايف أموت وما اشوفك .. د. عز الدين حسين أبو صفية

د. عز الدين حسين أبو صفية

قصيدة بالعامية

خايف أموت :::وما اشوفك :::
،،،،،،،،،،،،،،،،،،،،،،،،،،،،،،،،،،،،،،،،،،،،،

إنتي وين
يا حبيبة العين
حبيتك ... أنا ... والله حبيتك
حبيتك من سنين وسنين
لمن عنيّ شافت منديلك
ساعتها والله حاولت أناديلك
لكن صوتي في حنجرتي مكتوم
كتبتلك على طرف منديلك
إني أنا بأحاول أناديلك
وأنا اللى بغنيلك
وبحكيلك قصتي من يوم
ع ديارك مريت
وقررت اجيلك
وهيني اجيتك يا حبيبة العين
بالله عليكي
خليني اشوف بسمتك
وقُليلي خالك اللي ع خدك
ظايل مشتاق لبوسة مني
ولا تبدلت الأحوال
ولا مثل قلبي حيران ومحتار
والله يا حبيبة العين
أنا قلبي موجوع ... موجوع
موجوع ...
من كثر ما هو بيكي مشغول
وما عاد ع بُعدك عندو صبر
وما قادر يظل بهيك وضع
فكري وقلبي بهيك موضوع مشغول
ومشتهي شوفة بسمتك
وضحكتك ... والوشم اللى ع كتفك
مشتهي يسمع رنة خلخالك
ويشوف تفاح خدودك
ويقبل خالك اللى متربع
ع صحن الخد
والله يا حبيبة القلب
 أنا اللي مشتاق للقد
أنا قلبي موجوع ... موجوع
والله يا حبيبة القلب  أنا خايف ...
خايف أموت
غريب الوطن والدا
وما عندي حبيبة غيرك
ولا عندي أسرار
خايف أموت ... وما أشوفك
وما أقدر اودع عيونك
وخايف يدفنوني
مُش في مقابر العشاق
وصيتي لك حبيبة العين
ولصاحب الدار
إن أنا مُتت
يكتب ع قبري
هذا ضريح شهيد الحب
هذا ضريح
غريب الدار

 ،،،